Dumistansya ang pamilya Marcos sa usapin ng umano’y compromise agreement na nabuo sa pagitan nila at ng pamahalaan na may kaugnayan sa pagsasauli ng mga sinasabing ‘nakaw na yaman’ o ‘ill – gotten wealth’.
Ito’y makaraang kumpirmahin ni Presidential Chief Legal Counsel Atty. Salvador Panelo na natanggap nga nila ang isang draft proposal mula sa loyalistang si Atty. Oliver Lozano.
Ayon kay dating Senador Ferdinand ‘Bongbong’ Marcos Jr., wala silang nalalaman hinggil sa sinasabing kasunduan at hindi din kinakatawan ni Lozano ang kanilang pamilya bilang abogado.
Una nang itinanggi ng Malakanyang na nagkasundo na ang gobyerno at pamilya Marcos hinggil sa isyu ng ‘nakaw na yaman’ at iginiit na isa itong mungkahi na hindi pa nakikita o nababasa ni Pangulong Rodrigo Duterte.
Ayon kay Presidential Spokesman Harry Roque, bahala na ang Kongreso na talakayin ang naturang usapin dahil sa umiiral na separation of powers ng dalawang sangay ng pamahalaan na kanila naman aniyang iginagalang.