Pinangalanan na ng mga dating empleyado ng National Agri-Business Corporation (NABCOR) ang 4 na retirado at kasalukuyang opisyal ng Commission on Audit na sangkot sa 500 million peso pork barrel fund scam.
Kinilala ang mga ito na sina dating COA Commissioner Juanito Espino Junior; dating Director Tito Nabua; State auditors Herminia Aquino at Carmelita Sanchez na pawang nakinabang umano sa NABCOR sa pamamagitan ng president nitong si Alan Javellana.
Si Espino at Nabua ay kapwa nagretiro noong 2013 habang pumanaw si Aquino ngayon lamang taon at hindi na rin mahanap si Sanchez.
Kabilang din si Javellana sa mga akusado naman sa 10 billion pork barrel scam kung saan utak umano ang negosyanteng si Janet Lim-Napoles.
Isiniwalat ng mga testigo na ang implementasyon ng mga proyektong pinondohan ng mga mambabatas mula sa kanilang Priority Development Assistance Fund sa pamamagitan ng NABCOR ay nabalot ng mga iregularidad.
Una ng binatikos ni Atty. Levito Baligod, abogado ng mga PDAF scam whistleblower ang pagbubulag-bulagan ng COA dahil na rin sa mabilis na paglusot ng mga pondo para sa mga pekeng NGO.
By: Drew Nacino
