Sugatan ang tatlo (3) sa 25 Korean Nationals na sakay nang nahulog na tourist bus sa isang kanal sa Barangay Habana, Nabas, Aklan.
Ayon sa mga otoridad, galing ng Boracay ang nasabing tourist bus na minamaneho ni Ferdinand Napat nang mawalan ng preno sa pabulusok na highway sa nasabing lugar.
Inamin ni Napat na nawalan siya ng kontrol kaya’t inihulog na lamang niya sa kanal ang isang bahagi ng gulong ng bus hanggang bumangga sa kongkretong poste at puno ng niyog kaya’t hindi tuluyang nahulog sa medyo may kalalimang bangin.
Kaagad isinugod sa ospital sa Kalibo ang mga nasugatang Koreano na umano’y may hinahabol na international flight pabalik ng Korea mula sa ilang araw na bakasyon sa Boracay.
By Judith Larino