Sugatan ang dalawang sundalo matapos masabugan ng landmine sa Kalawit, Zamboanga Del Norte.
Ayon kay Western Mindanao Police Spokesperson Chief Inspector Helen Galvez, bumibyahe patungong Palalian Bridge ang mga sundalo mula sa Charlie Company ng 42nd Infantry Battalion ng Philippine Army nang maglagay ng landmine ang tatlong armadong lalaki doon.
Nang malapit na aniya sa tulay ang mga sundalo, pinasabog ng mga ito ang bomba na dahilan ng agad na pagkakasugat ng dalawang hindi pinangalanang sundalo.
Nagkaroon din aniya ng saglit na engkwentro bago tumakas ang mga armadong lalaki patungong Labason Town.
Sinabi naman ni 1st Infantry Division Public Affairs Chief Major Ronald Suscano, pawang mga NPA o New People’s Army ang nagsagawa ng operasyon sa bayan ng Kalawit.