Apat na presidential candidates na ang tumangging dumalo sa debateng inorganisa ng SMNI, na broadcasting arm ni Kingdom of Jesus Christ Founder, Pastor Quiboloy.
Ito ay sina Vice President Leni Robredo, Senators Ping Lacson, Manny Pacquiao at Manila Mayor Isko Moreno.
Aminado si Pacquiao na gusto man niyang pumunta sa lahat ng debate at public forum pero hindi siya sisipot sa imbitasyon ng himpilan ni quiboloy dahil sa pagiging wanted nito sa U.S. Sa kasong trafficking.
Hindi umano maatim ng kanyang konsensya na lumahok sa anumang aktibidad na inorganisa ng isang wanted sa nakasusuklam na krimen at gumagamit sa pangalan ng diyos sa religious scam.
Inihayag naman ni Lacson na hindi sila dadalo ng ka-tandem na si Senate President Tito Sotto dahil may inendorso ng mga kandidato si Quiboloy.
Mayroon namang nakatakdang pulong si Robredo sa mga leader at supporter sa Panay Island pero kanyang tiniyak na present siya sa lahat ng COMELEC-sponsored at accredited debates.
“Jam-Packed” din ang schedule ni Moreno na mayroong mga speaking engagement sa Samar provinces.
Samantala, tanging sina dating senador Bongbong Marcos at Labor Leader Leody De Guzman ang dadalo sa presidential debate ng SMNI ngayong araw. - Sa ulat ni Cely Ortega-Bueno at sa panulat ni Drew Nacino
