Hindi na ipatatawag muli ng Senate Blue Ribbon Committee sa pagdinig ng 6.4 billion-peso shabu shipment sina Davao City Vice Mayor Paolo Duterte at Atty. Mans Carpio.
Ayon kay Senador Richard Gordon, una at huli nang pagharap nina Paolo Duterte at Carpio ang isinagawang pagdinig ng senado kahapon kaugnay sa alegasyon ng katiwalian sa BOC o Bureau of Customs.
Sinabi ni Gordon na dismayado siya sa ginawang pagtatanong ni Senador Antonio Trillanes na sumentro lang sa tattoo ng bise alkalde at bank accounts na walang sapat na ebidensya mula sa AMLC o Anti – Money Laundering Council.
Wala na aniyang natitirang bala pa si Trillanes matapos umamin si Mark Taguba na ‘hearsay’ lamang ang pagkakabanggit niya kay Paolo Duterte at Carpio hinggil sa Davao Group.