Patay ang isang bise alkalde at security aide ng isang konsehal makaraang pasukin sila sa session hall at pagbabarilin ng hinihinalang mga “hired killer” habang kasagsagan ng sesyon sa sangguniang bayan ng Jones, Isabela kahapon ng umaga.
Ayon kay Atty. Jay-ar Vallejo, legal consultant ng napaslang na si Vice Mayor Florante Raspado, binasag ng gunman ang salamin na pintuan ng session hall saka pinuntiryang ratratin ang ulo ng bise alkalde sa harap ng mga nagsisigawan sa takot na mga konsehal na nagdaraos ng sesyon.
Maluha-luhang isinalaysay ni Vallejo na bagama’t nakahiga na si Raspado sa sahig, patuloy pa ring inubos ng killer na naka-military uniform ang bala ng kanyang M-16 sa ulo ng biktima saka kasuwal na naglakad palabas ng gusali.
Si Marc Anthony Agarin na bodyguard ni konsehal Lanie Uy at kaalyado ni Raspado ay napatay rin sa pag-atake.
Mabilis na tumakas ang di kilalang mga suspek sa direksyon patungong kabundukan ng Sierra Madre matapos ang krimen.
Hawak naman umano ng pulisya ang 2 suspek na ipinasasailalim na sa interogasyon habang 2 pa ang tinutugis.
Pulitika ang sinisilip na dahilan sa pagpatay sa Bise Alkade.
By Mariboy Ysibido
