Na-hack ang opisyal na Twitter account ng Pasig’s Public Information Office (PIO) kagabi, Abril 9, 2022.
Nangyari ang pangha-hack ilang oras matapos ang Day of Valor grand campaign rally na isinagawa ng kasalukuyang alkalde ng lungsod kasama ang kaniyang election slate.
Ayon sa ulat, bandang alas onse kagabi nang may nagpalit sa username ng Pasig PIO sa “Pasig.eth”, kasama ang Twitter bio na “co-founder of @AzukiOfficial former character art director for @playOverwatch. Pixel art enthusiast.”
Sunod-sunod din ang naging tweet nito na walang kinalaman sa aktibidad ng Pasig PIO at nag-tag ng mga hindi kilalang Twitter account.
Sa ngayon, wala pang inilalabas na pahayag ang Pasig LGU sa nangyaring insidente. — Sa panulat ni Abie Aliño
