Asahan na ang mas malalang sitwasyon ng trapiko sa Metro Manila habang papalapit ang panahon ng Kapaskuhan.
Ayon kay MMDA Traffic Chief Bong Nebrija, bagama’t hindi ito magiging katulad ng noong bago ang pandemiya, inaasahan pa rin nila ang mas mabigat na trapiko.
Lalo na aniya kapag nagsimula na ang Christmas rush o pamimili ng mga tao bago ang holiday gayundin ng mga Christmas sales.
Sa kasalukuyan, inirereklamo ng maraming motorista ang matinding traffic dulot ng pagsasara ng mga u-turn slot sa EDSA.
Aminado naman si Nebrija na bagama’t bumilis ang takbo ng mga bus sa EDSA busway, bumagal naman sa bahagi ng mga pribadong sasakyang dahil sa pagsasara ng mga u-turn slot.
Isa aniya sa dahilan nito ang pagbiyahe na ng nasa 70% sa normal na volume ng mga sasakyan sa EDSA sa kabila ng pagpapatupad ng general community quarantine at nananatiling suspensyon sa number coding.