Ikinakasa na ng Department of Education (DEPED) Taguig City ang mga paghahanda para sa pagsisimula ng blended learning at ang flexible learning program o TFLEX bilang paghahanda sa muling pagbubukas ng klase ngayong taon.
Ito’y ayon kay Dr. George Tizon, Chief School Governance Operation ng DEPED-Taguig City kasunod ng ginawang cyber graduation ng higit sa 170 na mga mag-aaral sa Senior High School ng Senator Renato Cayetano Memorial Science and Technology High School (SRCC).
Kabilang sa mga inihahanda ng ahensya ay ang mga libreng school supply na kanilang ipamamahagi gayundin ang COVID-19 kits para sa mga mag-aaral, guro at mga empleyado ng mga paaralan.
Samantala, ipinagmalaki ng ahensya ang kanilang mga cyber-grad na naging daan para makapagtapos ang mga mag-aaral sa Senior High School lalo na noong kasagsagan ng mahigpit na community quarantine noong isang taon.
Magugunitang ginamit din ang robo nurse bilang robo-prof na tumulong sa pamamahagi ng mga diploma at certificate para maiwasan ang pagdagsa ng tao sa stage.
