Bumuo ng technical working group si Public Works and Highways Secretary Vince Dizon na magsusuri sa lahat ng flood control projects ng ahensya bago ito pondohan at simulan sa taong 2027.
Kasama sa grupo sina Environment and Natural Resources Undersecretary Carlos Primo David, Guillermo Tabios III, at Project NOAH Executive Director Mahar Lagmay.
Ayon kay Secretary Dizon, layunin ng binuong grupo na tiyakin na maayos, epektibo, at may siyentipikong batayan ang bawat proyekto bago ito ipatupad.
Dahil aniya marami siyang natuklasan na proyektong walang malinaw na plano o pag-aaral, dahilan kung bakit patuloy ang matinding pagbaha sa bansa kahit bilyon-bilyon na ang ginagastos ng gobyerno.
Ipinunto rin niyang may ilang proyekto na ginawa lang para pagkakitaan, kaya’t kailangang baguhin ang bulok na sistema.
Plano rin ng kalihim na gamitin ang naturang grupo sa pagbuo ng budget plan para sa 2027, habang hinihintay ang 18 major river system master plan mula sa mga international partners gaya ng World Bank, Asian Development Bank, at JICA. — sa panulat ni Jordan Gutierrez
