Maaaring mas maging lethal o nakamamatay kaysa COVID-19 ang mga susunod na pandemya.
Ito ang ibinabala ni Oxford-Astrazeneca Vaccine Creator Sarah Gilbert kasabay ng panawagang hindi dapat masayang ang mga leksyong natutunan sa COVID pandemic.
Ayon kay Gilbert, hindi ito ang huling pagkakataon na may mga virus na magbabanta sa sangkatauhan at hanapbuhay ng mga mamamayan at ang katotohanan ay maaaring mas maging malala pa ang mga susunod na pandemya.
Hindi anya dapat mabaliwala ang mga pinaghirapan ng mga healthworker na nagbuwis ng buhay bagkus ay dapat paghandaan ang mga panibagong uri ng sakit sa pamamagitan ng pagpopondo para sa pandemic preparedness.
Dito sa Pilipinas, may kahalintulad na hakbang nang inilatag noon, kagaya ng Senate Bill 1573 o Pandemic and All-hazards Preparedness Act ni yumaong Senador Miriam Santiago na lilikha ng isang National Health Strategy sakaling magkaroon ng mga pandemya at national emergencies.
Magugunitang nanawagan din si Pangulong Rodrigo Duterte sa kongreso na magpasa ng batas na lilikha ng sariling bersyon ng Pilipinas ng Center for Disease Prevention and Control.—sa panulat ni Drew Nacino