Nagpaabot ng pag-alala si Pangulong Rodrigo Duterte sa yumaong si dating pangulong Benigno Noynoy Aquino III.
Kasabay ito ng unang anibersaryo ng kamatayan ni PNoy kahapon.
Ayon sa pamunuan ng Manila Memorial Park sa Parañaque City, nagbigay ng bulaklak si Pangulong Duterte bilang pag-alala sa dating pangulo.
Kasama ito ng iba’t iba ring bulaklak na ipinaabot naman ng pamilya Aquino sa puntod nila yumaong dating Senador Ninoy, dating Pangulong Cory at dating Pangulong Noynoy.
Iisang aktibidad ang idinaraos kahapon at ito ang misang dinaluhan ng mga malalapit na kaibigan at tagasuporta ni PNoy sa Ateneo De Manila University sa Quezon City.
Ngayong araw, gugunitain din ang ika-89 na kaarawan ng yumaong si dating Pangulong Corazon Aquino.
