Tila lumalala ang isyu sa pamamahala ng basura sa Clark, Pampanga—matapos italaga ng Clark Development Corporation ang Prime Waste Solutions o PWS sa Pampanga bilang bagong kontraktor sa pagkolekta at pagtapon ng basura.
Ito’y matapos ang mahigit dalawang dekadang kontrata ng Metro Clark Waste Management Corporation o MCWMC noong Oktubre 2024. Ayon sa CDC, hindi na ito maaaring i-renew alinsunod sa Build-Operate-Transfer Law.
Ngunit pinupuna ng ilang eksperto ang kakayahan ng PWS. Sa ngayon, isa lamang umano ang Materials Recovery Facility nito sa Porac, Pampanga—at walang sapat na pasilidad para sa tamang pagtatapon ng residual waste.
Naging kontrobersyal ang usapin matapos mapag-alamang may Environmental Compliance Certificate na ang PWS mula sa DENR, kahit umano walang naging public consultation o Letter of No Objection mula sa lokal na pamahalaan.
Sa kabila nito iginiit ng CDC na dumaan sa tamang proseso ang pagpili ng bagong waste management partner, at patuloy ang kanilang koordinasyon sa mga kinauukulang ahensya upang matiyak ang maayos, ligtas, at legal na pamamahala ng basura sa Clark.
