Nagpasa na ng resignation letter si Mongolia’s Prime Minister Khurelsukh Ukhnaa ngayong Huwebes kasunod ng protesta ng mga Mongolians laban sa hindi magandang pamamalakad ng gobyerno sa pagtugon sa pandemyang COVID-19.
Batay sa ulat ng Reuters, nakasaad sa resignation letter ni Ukhnaa na inaako niya ang responsibilidad at tinatanggap nito ang panawagan ng publiko.
Ito ay kaugnay sa protesta ng mamamayan ng Mongolia nitong Miyerkules matapos makita sa isang video footage ang hindi makataong pagtrato sa isang pasyente ng COVID-19 at sa kasisilang lamang nitong sanggol.
Bunga nito, nananawagan ang mga Mongolians na magbitiw sa pwesto ang Prime Minister at ilan pang health officials na agad namang dininig ng mga naturang opisyal.
Dahilan upang magpasa na rin ng resignation letter ang ilang senior health officials at ang health minister ng bansa.
Samantala, hinihintay na lamang ang pag-apruba ng parliament sa pagbibitiw ng naturang punong ministro—sa panulat ni Agustina Nolasco
