Kinumpirma ng NCRPO o National Capital Region Police Office na nakapagtatag na ng kanilang puwersa ang Maute Terrorist group sa Metro Manila.
Ito’y makaraang ibunyag ni NCRPO Chief Director Oscar Albayalde na tukoy na nila ang kuta ng mga terorista kung saan, isa sa mga ito ay sa bayan ng Tanza sa lalawigan ng Cavite.
Ayon kay Albayalde, matagal nang naninirahan sa Metro Manila ang ilan sa mga miyembro ng Maute Terrorist Group na siyang sumusporta at nagpopondo naman sa kanilang mga kasamahan sa Mindanao.
Magugunitang naaresto kamakalawa ng pulisya si Nasib Ibrahim na isa sa mga miyembro ng Maute Group at isa sa mga suspek sa tangkang pagpapasabog ng bomba sa Roxas Blvd, malapit sa US Embassy nuong isang taon.
By: Jaymark Dagala
