Lagda na lamang ni Pangulong Rodrigo Duterte ang kinakailangan para tuluyan nang maipagpaliban ang May 2020 Barangay at Sangguniang Kabataan (SK) election sa December 2022.
Ito ay matapos na maratipikahan na ng dalawang kapulungan ng Kongreso ang panukalang batas para postponement ng halalan para sa Barangay at SK.
Batay sa isinasaad ng Bicameral conference committee report, ipagpapaliban ang nakatakdang Barangay at SK election sa Mayo ng susunod na taon at sa halip ay gaganapin na sa unang lunes ng December 2022.
Habang isasagawa naman ang mga susunod na halalan para sa mga nabanggit na posisyon kada tatlong taon.
Ayon kay Senate Electoral Reforms Committee chairman Imee Marcos, agad nilang ipadadala sa tanggapan ng pangulo ang enrolled copy ng niratipikahang bersyon ng panukalang batas para sa postponement ng Barangay at SK election.
