Pinaghahandaan na ng Department of Health (DOH) ang posibleng gastusin kung sakaling iaalok ng libre sa lahat ng Pilipino ang COVID-19 testing.
Ayon kay Health Secretary Francisco Duque III, pinag-aaralan na nila ito sa ngayon lalo na ang ilalabas na pondo upang maisakatuparan ang direktiba ni Pangulong Rodrigo Duterte.
Kailangan aniya nilang matiyak kung magkano ang halagang kakailanganin para mailibre ang lahat ng Pinoy sa COVID testing at ang Department of Finance at Department of Budget Management na ang mag-aanalisa kung kakayanin ba ito ng gobyerno.
Ipinunto rin ni Duque na marami na ring Pilipino ang halos hindi na nagbabayad sa mga test dahil covered na ito ng PhilHealth.
Una rito, sinabi ng Pangulo na kung mayroong sapat na pondo, pipilitin ng gobyerno na bumili ng testing kits at gawin ito ng libre sa lahat ng Pilipino.