Nagbabala ang Philippine National Police (PNP) laban sa mga Philippine Offshore Gaming Operators (POGO) na nagtatago ng impormasyon
Ito’y may kaugnayan sa mga insidente ng pagdukot sa mga POGO worker tulad na lang ng nangyari sa Angeles City nuong weekend.
Ayon kay PNP Chief P/Gen. Debold Sinas, dapat sumunod sa batas ng Pilipinas ang mga dayuhang nagtatrabaho sa bansa at i-ulat sa kanila ang mga insidente ng pagdukot .
Batay sa ulat mula sa PNP Anti-Kidnapping Group, nasagip nila ang POGO employee na kinilalang si Von Cam Lan sa hidout ng mga kidnapper sa Hanin Town Subdivision sa Brgy. Pampang, Angeles City nito lang Sabado ng hapon .
Tatlong hinihinalang Chinese ang naaresto ng PNP AKG Luzon Field Unit sa ikinasa nilang operasyon na kasama ng biktima sa nabanggit na lugar .
Bagama’t binasahan naman ng mga Pulis ang 3 suspek ng Miranda Rights, tumanggi pa rin silang ibigay ang kanilang tunay na pangalan at nabatid na kinuha umano ng employer ng mga ito ang kanilang pasaporte .
Kasalukuyang nasa Headquarters ng AKG sa Kampo Crame ang tatlo habang sila’y isinasalang sa malalimang imbestigasyon. —ulat mula kay Jaymark Dagala (Patrol 9)