Puspusan ang isinasagawang imbestigasyon ng PNP-Criminal Investigation and Detection Group (CIDG) upang matukoy ang mastermind at matunton ang kinaroroonan ng 26 na sabungerong nawawala, kabilang ang isang buntis.
Ayon kay PNP-CIDG Director P/Major Gen. Albert Ignatius Ferro, mahigit walong buwan nang nawawala ang 10 sabungero sa Bulacan at nanggaling din umano sila sa kaparehong cockfighting arena sa Sta. Cruz, Laguna na pinuntahan din ng ibang sabungerong nawawala.
Magugunitang una nang naiulat ang apat na sabungerong nawawala sa Sta. Cruz noong January 13, sinundan ito ng isa pang insidente ng anim na sabungerong nawala sa Maynila sa kapareho ring araw.
Samantala, ang buntis na napasama sa nawawala ay sumama lamang umano sa kanyang nobyo na nagpunta sa sabungan sa Laguna. –Sa panulat ni Mara Valle
