Dahil sa inaasahang dagsa ng mga biyahero’t turista sa mga lalawigan, nagpaalala ang Philippine National Police (PNP) sa publiko na huwag mag-post realtime sa social media ng kanilang aktibidad.
Ito’y ayon kay PNP Spokesperson, P/Col. Jean Fajardo ay upang hindi magkaroon ng pagkakataon ang mga kriminal na samantalahin ang Semana Santa upang makapanloob ng mga naiwang tahanan ng mga bakasyunista.
Ayon kay Fajardo, dapat siguruhin ng mga magbabakasyon na naka-lock ang kanilang iiwanang tahanan, wala ring mga appliances na naiwang nakasaksak upang hindi pagmulan ng sunog at kung maaari ay magbilin sa mga kapit-bahay.
Sa panahon kasing ito ng makabagong teknolohiya, sinabi ni Fajardo na updated na rin ang mga kawatan sa kanilang iligal na gawain kung saan ay nagsisilbi silang mga internet predators na tumitingin sa aktibidad ng publiko para duon maisakatuparan ang kanilang mga balak.
Kaya naman inilunsad ng PNP ang kanilang Oplan ligtas SUMVAC (Summer Vacation) 2022 kung saan ay magpapakalat sila ng mas maraming Pulis upang maging dagdag seguridad sa mga komunidad gayundin sa mga matataong lugar at tourist destinations.
