Ikinababahala ng Pilipinas ang mga kaganapan sa Myanmar, partikular na ang pagkaka-detine sa kanilang lider na si Aung San Suu Kyi.
Batay ito sa ipinalabas na pahayag ng Department of Foreign Affairs (DFA), matapos namang sabihin ni Presidential Spokesperson Harry Roque na isang panloob na usapin ang nagaganap na kudeta (coup d’etat) sa Myanmar.
Ayon sa DFA, patuloy na sinusundan ng gobyerno ng Pilipinas ang sitwasyon sa Myanmar at higit na ikinababahala ang kaligtasan ni Aung San Suu Kyi.
Magugunitang sa isang twitter post sinabi ni Foreign Affairs Secretary Teddy Locsin Jr. na personal opinyon lamang ni Roque ang naging pahayag nito hinggil sa sitwasyon sa Myanmar.
Aniya, walang kinalaman sa Foreign Policy ng bansa ang mga binanggit ni Roque.
Binigyang diin pa ni Locsin na isa sa pinakahuling hakbang na kanilang gagawin oras na tumindi ang sitwasyon ay ang humingi ng tulong sa armed forces para magkasa ng evacuation sa mga Pilipinong apektado ng kudeta sa Myanmar.
Dagdag ni Locsin, bumubuo na rin sila ng istratehiya ni Philippine Ambassador to Myanmar Eduardo Kapunan Jr. sakaling mag-iba pa ang sitwasyon sa naturang bansa.
