Ibinalik na sa Camp Aguinaldo, Quezon City si US Marine Lance Corporal Joseph Scott Pemberton matapos hatulang guilty sa pagpatay sa Filipino transgender na si Jeffrey “Jennifer” Laude.
Alas-9:26 kagabi nang dumating ang convoy ni Pemberton sa kanyang detention center sa joint US military assistance group matapos ang mahigit 2 oras na biyahe mula Olongapo City.
Una ng ipinag-utos ng korte na dapat ipiit pansamantala si Pemberton sa New Bilibid Prisons (NBP) sa Muntinlupa City.
Gayunman, mananatili ang Amerikanong sundalo sa compound ng AFP Headquarters hangga’t wala pang pinal na desisyon kung saan permanenteng lugar siya idedetine.
Una rito ay hinatulan na ng guilty ng Olongapo City Regional Trial Court Branch 74 si US Marine Lance Corporal Joseph Scott Pemberton kaugnay pagpatay sa Filipino transgender na si Jeffrey “Jennifer” Laude.
Gayunman, guilty lamang si Pemberton sa kasong homicide sa halip na murder.
Ipinag-utos din ni Presiding Judge Roline Ginez-Jabalde ng Branch 74 sa kampo ni Pemberton ang pagbabayad ng P50,000 bilang civil indemnity at P4.3 million sa pamilya Laude bilang damages for loss of earning capacity.
Bukod dito, pinagbabayad din ang akusado ng P155,255 bilang reimbursement para sa burol at libing ng biktima; dagdag na P50,000 para sa moral damages at P30,000 para sa exemplary damages.
By Drew Nacino | Jonathan Andal