Isang linggong suspendido ang pasok sa tanggapan ng Presidential Communications Operations (PCOO) simula ngayong araw Hulyo 21.
Batay ito sa ipinalabas na abiso ni PCOO Undersecretary for Administration and Legal Affairs Marvin Gatpayat matapos mabatid na positibo sa COVID-19 ang isa sa kanilang empleyado.
Ayon kay Gatpayat, sa loob ng isang linggo, isasailalim sa disinfection ang New Executive Building sa Malacañang Complex kung saan matatagpuan ang PCOO.
Kasabay nito, isasalang rin sa COVID-19 test ang mga matutukoy na primary at secondary contacts ng empleyadong nagpositibo sa COVID-19.
Magbabalik ang operasyon ng PCOO sa Lunes Hulyo 27.
