Iginiit ni Dr. Tony Leachon dating special adviser ng National Task Force (NTF) against Covid-19, na dapat igalang ang naging pasya ni Pangulong Ferdinand “Bongbong” Marcos Jr., hinggil sa pagpili ng bagong Undersecretary ng Department of Health (DOH).
Nabatid na itinalaga ng Punong Ehekutibo si Retired Pol. Gen. Camilo Cascolan, bilang DOH Usec., kung saan, marami ang nagbigay ng reaksiyon at nagpahayag ng pagka-dismaya dahil hindi raw umano nito linya ang naturang posisyon.
Ayon kay Leachon, kailangang maalis ang negatibong pananaw at toxic feelings ng publiko, dahil mas makatutulong sa bansa, ang pagiging kalmado at pagkakaroon ng tiwala sa bagong itinalaga ng Pangulo.
Sinabi pa ng health expert, na karapatan din ni PBBM na mamili ng bagong uupo sa posisyon, dahil siya ang namumuno sa bansa at mas mainam kung hintayin nalang na mapatunayan ng mga bagong opisyal ang kanilang sarili hinggil sa kanilang tungkulin.
Samantala, sa ngayon, mahigit apat na buwan namang nananatili pa ring bakante ang posisyon ng DOH Secretary, sa ilalim ng Administrasyong Marcos.
