Naglabas na ng paalala ang Caloocan City Government kaugnay sa paggunita ng Undas 2022.
Batay sa anunsyo ng lokal na pamahalaan, simula October 25 ay pahihintulutan na ang paglilinis at pagpipintura sa mga puntod habang pansamantalang hindi papayagan ang paglilibing simula October 28 at papayagan muli ito sa November 2, 2022.
Bubuksan naman ang mga sementeryo sa lungsod simula October 29 hanggang November 2 mula ala- 6 ng umaga hanggang ala – 6 ng gabi.
Mahigpit na ipatutupad ng mga otoridad ang ‘one entrance, one exit’ policy, at tanging mga fully vaccinated individuals ang papayagan na pumasok sa sementeryo.
Dapat ding magpakita ng vaccine card at hinihimok naman ang publiko na magsuot ng face mask at panatilihin ang pagsunod sa health protocols bilang pag-iingat sa COVID-19.
