Nasa indonesia na si Pangulong Rodrigo Duterte para sa kaniyang kauna-unahang state visit mula nang maupo bilang Pangulo ng bansa.
Ito’y matapos dumalo ang Pangulo sa katatapos pa lamang na ASEAN Summit na ginawa sa Vientiane, Laos.
Mag-aalas-10:00 kagabi nang lumapag ang eroplano ng Pangulo sa Halim Perdana-Kusuma International Airport sa Jakarta.
Agad dumiretso ang Pangulo sa Shangri-la Hotel kung saan siya nagpahinga at nagpalipas ng gabi.
Ngayong araw, unang aatupagin ng Pangulo ang pakikipag-usap sa Filipino community sa Indonesia.
Susundan ito ng pag-aalay ng bulaklak sa heroes cemetery at ang maikling tour ng Indonesian President kay Pangulong Duterte sa Tanah Abang sa Central Jakarta.
Inaasahang bibigyan ng arrival honors ang Pangulo at makikipagpulong kay Indonesian President Joko Widodo.
Dakong ala-7:00 naman mamayang gabi bibigyan ng state dinner ang Pangulong Duterte sa Presidential Palace bago umuwi sa Pilipinas.
By Jaymark Dagala | Aileen Taliping (Patrol 23)
Photo Credit: AFP
