Hindi nagustuhan ng Palasyo ang panghihimasok ng Estados Unidos sa isyu ng kaso ni Rappler CEO Maria Ressa.
Ayon sa tagapagsalita ng Pangulo na si Secretary Harry Roque, hindi aniya tatanggapin ni Pangulong Rodrigo Duterte ang pangingialam at panghihimasok ng sinumang dayuhan sa mga kaso rito sa ating bansa.
Dagdag pa ni Roque, ang mga punang ito ng Estados Unidos ay ‘di makakatulong sa bilateral relations ng dalawang bansa.
Magugunitang nagpahayag ng pagkadismaya ang US state department sa naging hatol ng korte kay RESSA hinggil sa cyber libel nito. Anila, pareho pa namang may commitment ang Pilipinas at Estados Unidos hinggil sa freedom of expression.
Samantala, iginiit naman ni Secretary Roque, na ang Pilipinas ay may sariling hudikatura na sang-ayon sa ating saligang batas.
