Hindi kukunsintihin ng Malakanyang ang anumang uri ng pagbabanta o pangha-harass sa mga miyembro ng media.
Ito’y makaraang makarating sa Palasyo ang sumbong ng ilang miyembro ng Malakanyang Press Corps na binubully at hina-harass umano ng ilang bloggers at supporter ni Pangulong Rodrigo Duterte.
Kasunod nito, hinimok ni Presidential Communications Secretary Martin Andanar ang mga nagrereklamong mediamen na magsampa ng kaso laban sa mga nagbabanta sa kanila.
Hinikayat din ni Andanar ang mga ito na dumulog sa Presidential Task Force on Media Security na pinamumunuan ni Undersecretary Joel Egco upang mabigyan sila ng agarang proteksyon at magawan ng karampatang aksyon.
