Iginiit ng Malakanyang na hindi maiimpluwensyahan ng mga opisyal ng Department of Public Works and Highways ang gagawing imbestigasyon sa mga flood control projects ng gobyerno.
Ayon kay Palace press officer at Communications Undersecretary Claire Castro, hindi kabilang ang D-P-W-H sa mga inatasang tumutok sa naturang imbestigasyon dahil limitado lamang ang papel nito sa pagbibigay ng impormasyon at mga record ng proyekto.
Nilinaw ni Usec. Castro na pangungunahan ng Regional Project Monitoring Committee ang imbestigasyon, habang magsisilbing oversight chairman o tagapamasid ang mga regional director ng Department of Economy, Planning and Development kung saan kasama nito ang kanilang counterpart sa Department of Budget and Management at Department of the Interior and Local Government, habang magsisilbing regional team leader ang Presidential Management Staff.
Maaari rin aniyang magkaroon ng papel ang mga non-government organizations kung kakailanganin, na maaaring sa mga gagawing site inspection, pagre-record, at pagsama-sama ng mga report.
