Kinumpirma ni Budget Secretary Amenah Pangandaman na walang alokasyon ang Ayuda Para sa Kapos ang Kita Program (AKAP) sa ilalim ng 2026 National Expenditure Program matapos ang pormal na pagsusumite nito sa Kamara.
Ayon sa kalihim, mayroon pang natitirang pondo sa 2025 national budget at limitado rin aniya ang fiscal space kaya hindi muna nila isinama ang AKAP sa binigyan ng pondo.
Ipinaliwanag ng kalihim na nasa mahigit sampung-trilyong piso ang orihinal na kabuuang halaga ang budget proposals mula sa mga ahensya ngunit hindi lahat ay napagbigyan.
Sinabi naman ni House Committee on Appropriations chairperson Mikaela Suansing na hindi pa napag-uusapan sa Kamara ang AKAP ngunit pagbabatayan umano nila ang isinumiteng NEP.
Dinepensahan din ng mambabatas ang AKAP at iginiit na lubhang mas nakakatulong ito sa mamamayan lalo na sa mga hindi naaabot ng Assistance to Individuals in Crisis Situations o AICS at minimum wage earners.
