Idinepensa ng Malakanyang si Pangulong Rodrigo Duterte matapos nitong ikwento sa kanyang naging talumpati sa Kidapawan City ang panghihipo niya umano sa kanilang kasambahay noong siya ay teenager pa.
Ayon kay Presidential Spokesperson Salvador Panelo, gumawa lamang ng kwento si Pangulong Duterte para mabigyang diin ang kanyang naranasang seksuwal na pang-aabuso mula sa isang pari noong kabataan niya.
Sinabi pa ni Panelo, sinadya ni Pangulong Duterte na dugtungan at dagdagan ng kalaswaan ang kanyang kwento para maisalarawan ang trato sa kanya at kanyang mga kamag-aral ng isang pari noon.
Magugunitang sa kanyang naging talumpati sa harap ng mga magsasaka sa Kidapawan city, ikinuwento ng Pangulo ang pangungumpisal umano sa isang pari tungkol panghihipo sa kanilang kasambahay noon.
