Pinakikinabangan na ng mga biktima ng bagyong Yolanda ang halos 11,000 housing units na ipinatayo ng administrasyong Duterte sa Tacloban City.
Ipinagmalaki ito ni Presidential Spokesman Harry Roque kaugnay sa paggunita ng ika-apat na anibersaryo ng pananalasa ng bagyong Yolanda ngayong Miyerkules, Nobyembre 8.
Ayon kay Roque, ang nasabing permanent housing units ay mula sa kabuuang mahigit 14,000 resettlement housing project na target maipatayo ng gobyerno sa mga lugar na sinalanta ng super typhoon Yolanda.
Binigyang – diin ni Roque na ang mga nasabing shelter assistance ng Duterte administration ay pinakamaganda at pulidong housing model.
Una nang ibinalita ni Roque na nakumpleto na din ng gobyerno ang rehabilitasyon ng mga paaralan, seaport at airport facilities sa Tacloban City.
