Naging emosyonal ang pagtataas ng bandila sa City Hall ng Marawi para sa ‘Araw ng Kalayaan’.
Natuloy ang flag raising sa kabila ng kabiguang mabawi na ng tuluyan ang siyudad sa kamay ng Maute Group.
Hindi napigilan ni Marawi City Mayor Majul Gandamra ang maiyak habang nagsasalita hinggil sa mala bangungot na karanasan ng kanyang mga nasasakupan.
Nagsagawa rin ng hiwalay na flag raising ang Lanao del Sur Provincial Capital na nakakasakop sa Marawi.
Naiyak rin si Lanao del Sur Vice Governor Mamintal Adiong habang humihingi ng paumanhin sa libo-libong evacuees dahil anya sa pagdurusang nararanasan nila sa panahon pa naman ng Ramadan.
Samantala, umiikot ang mga sundalo sa iba’t-ibang panig ng Marawi upang palibutan ng mga bandila ng Pilipinas ang buong lungsod at labanan ang itim na bandila ng Maute Group.
Labanan sa pagitan ng militar at Maute Group muling sisiklab
Sunod-sunod na pagsabog at putok ng mga baril ang sumabay sa pagtataas ng bandila ng bansa sa Marawi City Hall.
Senyales ito ng muling pagsiklab ng labanan sa pagitan ng militar at Maute Group.
Muling tiniyak ng militar na hindi nila tatantanan ang Maute hanggang hindi napupuksa ang mga ito.
Mayo 23 nang salakayin ng Maute ang Marawi city at mula noon, may naitala nang isandaan at apatnaput tatlong (148) napatay sa panig ng mga bandido, limamput walo (58) sa panig ng mga sundalo at pulis at dalawamput isang (21) sibilyan.
By Len Aguirre | With Report from Jonathan Andal
