Ipaubaya na lamang kay Pangulong Rodrigo Duterte ang pagpapasya kung dapat ba o hindi na isapubliko ang kaniyang listahan ng mga opisyal ng barangay na sangkot sa iligal na droga.
Ito’y ayon kay Senate Majority Leader Tito Sotto sa harap ng magkaka-kontrang pananaw nila DILG Officer-In-Charge Eduardo Año at Incoming PNP Chief Oscar Albayalde hinggil sa mungkahing isapubliko ang narcolist sa mga botante.
Giit ni Sotto, kapwa naman aniyang may katuwiran ang dalawang nabanggit na opisyal sa naturang usapin subalit ang Pangulo pa rin aniya ang may huling salita hinggil dito.
Pero kumporme naman dito si Senate President Koko Pimentel nanagsabing pagkakataon iyon para sa mga nasa narcolist na linisin ang kanilang pangalan.
Mas magiging patas din ayon kay Pimentel para sa lahat na maisapubliko ang nasabing listahan upang maiwasan din magamit ito ng ilang mapagsamantala kaya’t dapat hindi ito isinisikreto.
Sa panig naman ni Senador Sonny Angara, Chairman ng Senate Committee on Local Government, dapat munang linawin na preliminary findings pa lamang ang nasabing listahan at magandang ilagay din dito ang source ng impormasyon maliban na lamang kung nagmula ito sa classified o intelligence source.
Magugunitang iginiit ni Secretary Año na dapat ilabas ang narco-list para makatulong sa mga botante na makapili ng susunod na mamumuno sa kanilang barangay ngayong darating na halalan.
Pero ayon naman kay Albayalde, may karapatan pa rin naman sa due process ang mga nasa narcolist dahil hindi pa naman nakakasuhan ang mga ito at baka magamit lamang sila ng kanilang kalaban.