Pulitika ang nakikitang dahilan ng Malacañang sa ipinalabas na dismissal order ng Office of the Ombudsman laban kay House Deputy Speaker Gwendolyn Garcia dahil sa katiwalian.
Ayon kay Presidential Spokesperson Harry Roque, bagamat kanilang iginagalang ang desisyon ng Ombudsman, kaduda-duda naman aniya ang naging timing nito.
Isa aniya si Garcia sa bumubusisi sa mga kontrobersyang kinasasangkutan ng nakaraang administrasyon kabilang ang dengvaxia dengue vaccine at impeachment complaint laban kay Chief Justice Maria Lourdes Sereno.
Iginiit pa ni Roque na tanging liderato lamang ng kongreso ang maaaring makapagpatalsik sa isa sa kanilang miyembro at kung hindi ipatutupad ang dismissal order ay hindi maaalis sa pwesto ang isang mambabatas.
