Nangunguna ang barangay Socorro sa Quezon City sa may pinakamataas na antas ng krimen sa naturang lungsod.
Iyan ang inihayag ni Quezon City Police District Director Chief Superintendent Joselito Esquievel batay sa police blotter at eight-focus crimes tulad ng rape, physical injury, robbery, 4 wheeled at motorcycle carnapping.
Nakapagtala ng 29 na kaso ang barangay Socorro na sinundan naman ng Bagong Pag-Asa na may 20.
Kapwa nakapagtala naman ng tig-18 insidente ng krimen sa mga Barangay Batasan Hills at Holy Spirit habang may mga naitala rin sa mga barangay Greater Lagro, Fairview, Pinyahan, E. Rodriguez, Payatas at South Triangle.
Nangunguna naman sa listahan ng mga krimen ang theft cases na may 208 kaso, robbery na may 94 na kaso, physical injury na may 82 kaso, motorcycle theft, carnapping, rape at homicide.
Sinasabing talamak ang krimen sa mga nabanggit na barangay mula alas-7:00 hanggang alas-11:00 ng gabi kaya’t inatasan ni Esquievel ang lahat ng mga station commanders sa kaniyang nasasakupan na paigtingin ang police visibility sa lungsod.
—-
