Hinimok ni Senador Christopher “Bong” Go ang mga kinauukulang ahensya ng gobyerno na gamitin ang coronavirus disease 2019 (COVID-19) test kits na dinevelop ng University of the Philippines (UP).
Ayon kay Go, chair ng senate committee on health, hindi dapat aksayahin ang oras at pagod ng mga local scientist ng bansa sa pagdevelop ng mga testing kits na ito.
Aniya, kung matitiyak naman ang bisa nito sa pagdaan sa mga pagsusuri ay maaari itong gamitin para mas mapaigting pa ang kakayahan ng bansa sa pagtetest , trace at treat.
Ang naturang test kit na unang inanunsyo ng siyentipikong si Dr. Raul Destura noong Pebrero ay aprubado na gamitin ng Food and Drug Administration.
