Sa kabila ng pagkansela ng taunang prusisyon na traslacion, plano paring ituloy ang pagdiriwang ng Pista ng Itim na Nazareno sa pamamagitan ng paglilibot sa Imahen ng Itim na Nazareno sa mga simbahan sa iba’t ibang panig ng Luzon.
Kabilang sa mga lugar na pupuntahan ng Imahen ng Itim na Nazareno ay ang Baguio City, La Union, Dagupan City, Cabanatuan City sa Nueva Ecija, Pampanga, Tarlac, Atimonan at Lucena sa Quezon, san Pablo City sa Batangas at Imus sa Cavite.
Idadaan din ito sa simbahan sa Las Piñas at Baclaran Church sa Parañaque City bago ito bumalik sa Quiapo Church.
Ayon kay Fr. Douglas Badong, Parochial Vicar ng Minor Basilica of the Black Nazarene o Quiapo Church, magsasagawa rin sila ng misa sa mismong araw ng pista ng Itim na Nazareno at kanila ding itutuloy ang taunang thanksgiving procession ngayong araw kasabay ng pagdiriwang ng Bonifacio Day pero gagawin ito sa pamamagitan ng motorcade.
Ilalagak din ang Poong Nazareno sa Sta. Cruz Church na tatagal ng 9 na araw.
Samantala, mahigpit namang imomonitor ng Philippine National Police o PNP at Hijos para matiyak na magiging maayos ang mga pagdiriwang at maiwasan ang pagkalat o pagtaas ng COVID-19. —sa panulat ni Angelica Doctolero
