Nanawagan ang Malacañang sa publiko na pairalin ang diwa ng bayanihan upang matiyak ang maayos, tahimik at maaliwalas na pagbubukas ng klase.
Sinabi ni Presidential Communications Secretary Sonny Coloma na mahalagang pagtulungan ang lahat ng aspetong may kinalaman sa pagpasok ng mga estudyante sa paaralan.
Bagamat plantsado na ang lahat ng mga paghahanda ng Department of Education katuwang ang iba’t ibang ahensya ng gobyerno, ipinabatid ni Coloma na may bagong ipinatupad partikular sa Cordillera Autonomous Region o CAR.
Dahil medyo may kalayuan ang CAR, sinabi ni Coloma na dinala sa lugar ang Oplan Balik Eskuwela sa pamamagitan ng pagkumpleto ng DPWH ng mga silid-aralan at pagmonitor ng Department of Trade and Industry o DTI ng presyo ng school supplies.
Sa ilalim ng Oplan Balik Eskuwela, inatasan ang Philippine National Police na magpatupad ng foot patrol at mobile patrol sa paligid ng mga paaralan at tiyakin ang police visibility.
Kaugnay dito, Naka-heightened alert na ang Philippine National Police para sa pagbubukas ng klase.
Ayon kay PNP Spokesman Chief Supt. Wilben Mayor, nito lamang Mayo ay nag-isyu na sila ng operational guidelines sa kanilang mga units mula sa regional hanggang sa municipal level.
Sinabi ni Mayor na mananatili ang heightened alert level hanggang sa katapusan ng buwan.
By: Meann Tanbio
