Ipinanawagan na ng mga negosyante sa gobyerno ang paglalagay sa Metro Manila at iba pang lalawigan sa mas maluwag na alert level 1 mula sa kasalukuyang level 2.
Ito’y upang maging fully operational na ang lahat ng business establishment at magbigay-daan sa tuluyang pagbangon ng ekonomiya ng bansa.
Kapwa sumang-ayon sina Presidential Adviser for Entrepreneurship Joey Concepcion, Philippine Chamber of Commerce and Industry President George Barcelon at Federation of Filipino-Chinese Chambers of Commerce and Industry President Henry Lim Bon Liong sa pag-downgrade ng COVID-19 alert status.
Ipinunto ni Concepcion na wala namang “choice” ang gobyerno kundi buksan ang ekonomiya upang matiyak na lalago ito at maiwasan ang pagkakabaon sa Debt-to-GDP ratio na lumalampas ng 60% na isang “red flag.”
Kung mababa anya ang Debt-to-GDP ratio ay mapananatili ng bansa ang investment rating nito upang makapangutang muli sa mas mababang interes.
