Asahan na ang pagkakaaresto ng mas marami pang mga consultant ng National Democratic Front o NDF matapos ang pagkakadakip sa isa nitong kasamahan na si Rafael Baylosis kamakailan.
Ayon kay Government Chief Negotiator at Labor Secretary Silvestre Bello, ngayong kanselado na ang peace talks sa pagitan ng gobyerno at mga komunista ay wala nang dahilan para manatili pa ang mga consultant sa labas ng kulungan.
Tinatayang nasa labing siyam (19) na mga NDF consultant aniya ang nabigyan ng pansamantalang kalayaan at nasaklaw ng Joint Agreement on Security and Immunity o JASIG para sumali sa peace negotiations.
Muli namang iginiit ni Bello na walang ginagawang ‘crackdown’ ang gobyerno sa mga rebelde o komunista, bagkus ay ipinatutupad lamang nila ang batas.
Matatandaang walang inirekomendang piyansa ang piskalya sa naarestong NDF consultant na si Rafael Baylosis gayundin sa kasamahan nitong si Guillermo Roque.
Ito ay dahil sa kasong Illegal Possession of Explosives na kinakaraharap ng mga ito ngayon.
Gayunman, nagrekomenda ang piskalaya ng P120,000.00 piyansa para naman sa kasong Illegal Possesion of Firearms ng dalawa.
