Pinamamadali ng ilang mambabatas ang pag-amyenda sa presidential decree 910 para mabigyan ng mas malaking pondo ang mga kalusugan ngayong nasa gitna ang bansa sa coronavirus disease 2019 (COVID-19) pandemic.
Sa inihaing house bill 7800 nina Manila Teachers Party-list Representative Virgilio Lacson, 1-Pacman Party-list Representative Eric Pineda, at Michael Romero, layon nitong amyendahan ang naturang batas para magkaroon ng kapangyarihan ang kongreso na i-redirect at magamit ang pondo ng malampaya sa rebilitasyon ng public health care infrastructures sa bansa.
Sa ngayon, ani Pineda, ay tinatayang lumoba na sa P8.6-trilyon ang pagkakautang ng bansa dahil sa nagpapatuloy na pandemya, na malinaw na mas mataas pa sa pambansang budget para sa susunod na taon.
Kaugnay nito, iginiit ni Lacson na mayroon pang higit sa P20-bilyon pondo ang Malampaya pero nakalaan lamang ito sa oil exploration.
Kung kaya’t nanawagan ang mga mambabatas sa liderato ng kamara na agarang pagtibayin ang panukala para magamit na sa susunod na taon ang pondo para sa pagsasaayos ng mga health care facilities sa bansa na siyang pakikinabangan din ng taong bayan.
