Itinaas ng Office for Transportation Security o OTS ang security condition level 2 kaugnay sa paggunita sa Araw ng mga Patay.
Kasunod na rin ito ng direktiba ni Department of Transportation o DOTr Secretary Arthur Tugade dahil sa inaasahang pagdagsa ng mga pasahero na ba-byahe pa lalawigan.
Inabisuhan ng OTS ang mga pasahero na posibleng mabago ang security plan kung saan posibleng ipadaan sa full body scanners at explosives trace detection ang mga pasahero.
Asahan na rin anito ang mga itatalagang checkpoints kaya’t pinapayuhan ang mga pasahero na personal na ayusin ang kanilang mga bagahe para matiyak na walang ipinagbabawal na gamit sa loob ng kanilang mga bagahe.
Nanawagan din ang OTS sa publiko na makipag tulungan sa kanila para matiyak ang kanilang seguridad.
