Idinagdag na ang Oman at United Arab Emirates (UAE) sa mga bansang kasama sa travel ban dahil sa COVID-19.
Lahat ng mga byahero na magmumula sa Oman at UAE o mayroong travel history sa nasabing dalawang bansa sa loob ng 14 na araw ay pinagbabawalan nang makapasok sa bansa simula ika-15 ng Mayo hanggang ika-30 ng Mayo, 2021.
Ito’y batay sa post ni Presidential Spokesperson Harry Roque, aniya, ito’y upang maiwasan ang mas lalong pagkalat ng naturang double mutant variant na unang nadiskubre sa India.
Habang ang mga darating na byahero bago ang araw ng travel ban ay hindi sakop ng restriksyon ngunit kailangan pa rin nilang sumailalim sa 14 days quarantine at swab test.
Magugunitang inirekomenda ni Department of Health Secretary Francisco Duque III at ng Department of Foreign Affairs ang pagsama sa Oman at UAE sa travel ban matapos may maitalang dalawang kaso ng COVID-19 variant mula India ang mga naturang bansa.
Samantala, pinalawig hanggang katpusan ng buwan ng Mayo ang travel ban sa bansang India, Pakistan, Nepal Bangladesh at Sri Lanka.