Humingi pa ng paumanhin sa kaniyang mga amo ang nawawalang OFW sa Saudi Arabia na si Nilda Bongar, bago ito tuluyang tumakas.
Sa pamamagitan ng isang interpreter, sinabi ng Arabong amo na si Ashraf Abdullah Ahmed Dakman, nag-sorry pa sa kanya ang Pinay OFW dahil sa nagawang “pagkakamali” bago tuluyang tumakas noong Disyembre ng taong 2016.
Ipinaliwanag pa daw sa kanila ni Nilda na ang pagkamatay ng kanyang ina nung araw na iyon ang dahilan kung bakit sya malungkot.
Pahayag ng Arabong employer, wala siyang makitang dahilan para tumakas si Nilda dahil maayos naman ang kanilang pakikitungo dito.
Mariin namang itinanggi ng dayuhang employer ang balitang ikinukulong nila sa kwarto si Nilda.
Samantala, ipinakita naman ng employer ang mga naiwang gamit ni Nilda tulad ng maleta na naglalaman ng mga damit, mga dokumento at ang kaniyang pasaporte.
Nagpahayag pa ng kahandandaan ang dayuhang employer na ibigay ang mga gamit at passport ni Nilda sa OWWA basta’t mabigyan lang siya ng sulat na isang patunay na ibinigay na nito ang mga gamit ng Filipina OFW.
Mariin ding ipinangako ni Dakman na gagawin nito ang lahat para makatulong sa paghahanap kay Nilda.
RPE