Umakyat na sa 92% ang occupancy rate ng Manila COVID-19 field hospital sa Luneta sa gitna ng patuloy na pagtaas ng bilang ng nagkakasakit sa lungsod.
Sa pinakahuling datos ng pamahalaang lungsod, umabot na sa 318 ang okupado mula sa kabuuang bilang na 344 COVID bed capacity.
Nasa 64% naman ang occupancy rate sa anim na district hospital ng maynila kung saan sa aabot 313 COVID beds na ang okupado mula sa kabuuang 491.
Ang field hospital sa Luneta ay nakatutok sa mga pasyenteng may mild at moderate symptoms ng COVID-19 habang ang mga nasa critical at severe symptoms ay dinadala sa mga ICU ng mga district hospital.—sa panulat ni Drew Nacino
