Nanindigan ang Department of Interior and Local Government (DILG) na paiiralin nila ang “no permit, no rally policy” sa panahon ng APEC Summit.
Ipinaliwanag ni DILG Secretary Mel Senen Sarmiento na bagamat isinasaad ng batas na karapatan ng mga Pilipino na magpahayag ng saloobin, kailangan aniyang sumunod din ang lahat sa mga panuntunan kabilang na ang pagkuha ng permit para makapag-rally.
Sinabi ni Sarmiento na hindi na rin kailangan ng written permit kung ang kilos protesta ay gagawin sa Freedom Park na isinaad ng batas o kaya’y sa mga pampribadong lugar basta’t may consent o alam ito ng may-ari ng property.
Hindi na rin anya kailangan ng written permit kung sa pampublikong campus gagawin ang protesta basta’t sang-ayon ang aktibidad ng isang grupo sa panuntunan ng eskwelahan.
Inatasan na rin ng kalihim ang mga tauhan ng PNP na pairalin ang maximum tolerance at irespeto ang karapatang pantao habang mayroong nagpoprotesta kahit pa magkaroon ng dispersal.
By Meann Tanbio | Jonathan Andal