Nilinaw ng Department of Health na kailangan pa ring mag-presenta ng negative COVID-19 tests ang mga turista tuwing bi-biyahe.
Ito’y sa kabila ng anunsiyo ng Inter-Agency Task Force noong Lunes na maaari nang gamitin ang vaccination card kahit saang destinasyon.
Ayon kay Health Secretary Francisco Duque III, ibinalik muna nila ang resolusyon na nag-uutos sa mga local government unit na i-require sa mga biyahero ang pagpe-presenta ng negative COVID-19 result.
Nakatakda anyang mag-pulong ang mga ahensiya ng gobyerno ngayong araw upang isa-pinal ang polisiya sa pag-biyahe ng mga turista.
Magugunitang inalmahan ng mga LGU ang niluwagang travel protocol para sa mga fully-vaccinated na biyahero o turista dahil hindi umano sila kinonsulta. —sa panulat ni Drew Nacino
