Maganda ang naging pagtanggap ng publiko sa bagong Oplan Tokhang ng Philippine National Police (PNP) partikular sa Metro Manila.
Ito ang inihayag ni National Capital Regional Police Office (NCRPO) Chief Director Oscar Albayalde kasabay pagmamalaking umaabot na sa 500 drug personality sa kalakhang Maynila ang kanilang napasuko.
Ayon kay Albayalde, wala pa silang natatanggap kahit isang reklamo mula sa mga residente laban sa Oplan Tokhang magmula ng magbalik ito, isang buwan na ang nakalilipas.
Paliwanag ni Albayalde, posibleng mas naiintindihan na ngayon ng publiko ang konsepto ng tokhang kung saan katok at pakiusap lamang at walang halong patayan at pag-aresto.
Dagdag ni Albayalde, wala na rin aniya ang mga puna noon na mahihirap lang ang tinotokhang dahil natukoy na ng kanilang validated drug watchlist ang mga drug personality na kinakailangang katokin at pakiusapang sumuko.
Krista de Dios / Jonathan Andal / RPE